~貓眼的世界~

　　相信大家對未來戰士呢一齣老片一Ｄ都唔會陌生，話說有一晚我見到我媽媽o係電視睇緊未來戰士第三集，我又心血來潮想睇渦（其實我係第一次正式咁去睇＋＿＋～），跟住我就去左Foxy度搵喇（而家哩個時代太方便喇＝＿＝”），結果我一次過下載晒三集o黎睇，都有一Ｄ感受呀，同大家分享一下啦～

未來戰士第一集－－

　　一齣講述人類同電腦既戰爭，戰事由未來漫延到過去......劇情唔講咁多喇，相信大家都會略知一二。其實第一集亦都冇咩特別，只係一齣當時好有創意既科幻電影，我只係欣賞佢既拍攝手法，同電腦特技、電影化妝等等，不過電影中都反映出好多美國人既生活文化，對性愛既開放程度，一Ｄ社會觀念、風氣等，我發現原來舊時香港既明星髮型同衣著都同當時片中既人幾相似～  ^^~，應該係受到佢地既影響，感覺幾得意～

未來戰士第二集－－

　　好多人會話續集通常會拍得差過第一集，不過哩齣電影顯然唔係，無論係電腦特技，劇情性，都比第一集做得更好。如果你係第一次睇，你一開始可能會估唔到第一集既殲滅者已經變成o黎保護主角既人，而且好多場面都拍得令人更加緊張。電腦特技方面，液態機器人Ｔ－1000係好犀利既效果，佢可以話比人知，以後既電影係冇咩唔可能，變任何野任何人，天馬行空，電腦特技已經同真實世界睇唔出破綻！
　　不過我最有感受想寫既其實係片中一個好短既劇情、幾十秒既畫面。小主角康約翰要o係電話亭打電話俾佢既養父母，點身上冇散銀，跟住佢問阿諾舒華辛力加話：「你有冇散子呀？」（當然，原本佢係講英文^_^"）跟住阿諾舒華辛力加一句野都唔講，黎手就打爛個電話既錢箱部份，然後拎起一個銀仔俾佢。哈，其實佢幾型架，不過我就做唔到喇。我見到之後突然有一個諗法，o係現實生活中有好多時我地有一Ｄ想要或需要既野，但我地冇辦法去做到或者得到，而其實果Ｄ野只不過o係身邊冇遠，只係我地俾自己既常識局限左，當然，片中既情節我地做唔到，亦都唔應該咁做，不過如果我地可以知道多Ｄ生活之中既智慧，好似開心大發現果Ｄ智識咁，我地生活係可以方便好多，係一Ｄ「生活智慧」！

未來戰士第三集－－

　　黎到第三集，佢已經完全變成一齣商業電影，好賣既橋段又用一次，有名既明星繼續o係度，更多既火爆場面，凝造更緊張既氣氛，一架車撞牆，隔離架車竟然會無端端爆炸，一段接一段既追殺劇情，一齣典型商業電影。
　　不過佢同第一二集唔同既係，佢唔知點解推翻左第一二集既一個想法，未來既命運係可以變，而今集中佢地一切都只能順住命運前進。其實我都一直有去思考未來係唔係可以改變哩個問題，從一個常人既角度而言，未來係一個未知之數、一個變數，冇人可以知道佢會係點。但係如果o係一間房間，裡面只有自己一個，你係可以知道未來一兩分鐘，甚至一兩個鐘會發生咩事，因為變數好少，少到你好輕鬆就可以控制佢，但係要知道整個世界又唔同講法喇，因為太多人太多事太多變數，冇一個人可以知道同預測，更加唔好講話去控制，所以定論一「有能力既人可以改變有限度既未來。」
　　另一方面諗，其實一個人好想去做一件事，但係又唔一定可以做到。唔好講唔合理既事先啦，就係合理既事，好似讀書想升邊一班，同邊個朋友最好，同情人一生一世，哩一Ｄ事往往都好容易事與願違，有時就算你幾努力到頭來都會落空，但有Ｄ人唔需要去做D咩，又竟然會得到。再講，可能連一個人幾時發奮、會唔會去努力，定係一直都唔會有鬥心，都係注定左，點解會遇到哩個人，可能遠o係三分鐘前注定左，而哩三分鐘前發生既事又由其他既事引發，而哩Ｄ事又o係三十年前引發到而家？又或者你既基因一早就決定你係一個點既人，係男係女，有咩長處，會鍾意Ｄ咩，選擇咩成為你既生活方式、人生方向，所以定論二「有一部份事情一早由其他因素決定」
　　如果o係神學去諗我會覺得更加奇怪。神係一位全知全能既神，佢能夠預言一切既發生，知道每一個人既過去將來，你未出世佢已經知道你既存在，咁係咪即係其他所有事佢都決定晒，根本係注定？所以定論三「一切神已經決定好」

　　不過我知道無論係唔係一早注定都好，人係需要努力過先會成長，所以為未知既未來而奮鬥，就算只能夠改變有限度既事情，起碼我都唔會白做，因為經歷過既事永遠都存在o係我既智慧裡面！